六月新娘(105)_張愛玲

一〇五

　　第四十四場

　　景：酒家連街道

　　時：日

　　人：張、路人

　　D.I.

　　（張穿著大禮服匆匆走入南興。）

　　C.O.

　　第四十五場

　　景：南興酒家內

　　時：日

　　人：張、清、王、三號侍者、顧客

　　C.I.

　　（張穿禮服入南興。熟客王先生向他招呼。）

　　王：咦！張老闆今日做乜執得咁正呀？

　　張：唉！唔好提啦。（來王對面坐下）

　　王：系唔系慶祝勝利呀？

　　張：慶祝勝利？乜嘢勝利呀？

　　王：隔離嗰間北順樓俾你打淋咗喇嘛！

　　張：乜嘢話？隔離……

　　王：你唔知咩？北順樓唔夠你做，而家揾人頂手呀！

　　張：真嘅！（一則以喜，一則以憂）

　　王：（拍張肩）啲外江佬唔夠你鬥嘅，一味充闊，有乜辦法唔執笠呀，都系你好嘢。

　　張：北順樓真系要執笠？

　　王：系，千真萬確，乜你聽見唔高興咩？

　　張：我同北順樓個李四寶而家已經成咗親家啦。

　　王：啊？！

　　張：佢嘅女嫁俾我嘅仔做老婆，呢件嘢親家上頭，我要幫嚇佢手至得嘅。喂！究竟點解會執笠？

　　王：對唔住噃，我唔知你地已經系兩親家。

　　張：唔緊要，呢件事我而家既然知道梗系要關心嚇嘅！

　　王：我都唔系十分清楚。（又拍張背）怕乜嘢呀？驚你個親家要嚟你度黐餐咩？

　　張：（苦笑）王先生成日講笑。

　　（三號侍者送兩個菜上來。）

　　三號：呢兩個菜系送俾王先生食嘅，唔收錢。（張詫）

　　王：咦！做乜咁客氣呀？

　　張：（忍痛）應該嘅，應該嘅，請便。（起，走開，附聲間三號）喂！為乜事要送菜呀？

　　三號：系領班吳先生交帶嘅。

　　張：小吳交帶嘅？佢做乜嘢咁大方呀？

　　三號：今日佢對王先生系特別客氣啲嘅。

　　張：點解呀，系唔系個王先生貼士俾得多？

　　三號：（搖頭）唔系！（四顧低聲）領班想拉呢位王先生做股東去頂咗間北順樓落嚟。

　　張：乜話？佢想自己做老闆？

　　三號：系！佢仲拉埋我地大師傅同佢合股添，預備頂咗落嚟開廣東菜館。

　　張：佢都開廣東館？

　　三號：系呀！

　　張：（恨恨地）好嘢！挖我嘅大師傅響我隔離開廣東菜館？！（突然故意地向三號）你點會知道？

　　三號：點會唔知啫？佢想拉埋我一齊做啦嘛。

　　張：（不屑地）佢拉你入股？

　　三號：系，全間南興啲人佢個個都拉嚟。

　　張：咁你入咗股未呀？

　　三號：我邊有錢入股呀？我一個月的人工，攞番去剩系食都未夠呀！

　　張：唔好嘈，第二個月起加你五文一個月人工。

　　三號：加十文喇老闆。

　　張：七文，唔好話俾人知。

　　（張匆匆打電話。）

　　Diss.

　　（清入，張迎上。）

　　清：爸爸揾我有乜嘢事呀？

　　張：我頭先聽到話你外父嗰間北順樓要出頂！

　　清：（驚異）系？

　　張：佢地冇話俾你知呀？

　　清：冇，我想曼玲都會唔知，我剩系聽聞話佢爸爸為咗辦嫁妝，欠落一身債就有。

　　張：唉！咁佢又做乜咁闊佬仲要買層樓做嫁妝呀？

　　清：爸爸，我諗佢一定系冇錢又要頂硬上，夾硬將北順樓讓咗俾人，攞筆錢嚟買樓，你話系唔系嗱？

　　張：九成系啦，佢份人我都睇穿曬佢嘅啦。阿清，我地要想個辦法嚟幫嚇佢，無論如何唔俾佢間鋪頭執笠至得。

　　清：（感動）爸爸，我今日先至知你心地咁好嘅。

　　張：（有點不好意思，揮手）我一向都系咁嘅。

　　清：爸爸，唔啱我去叫佢唔好買樓啦。

　　張：冇用嘅，啲外江佬死要面子，你咁同佢話，佢未必肯。

　　清：唔啱我去話我地唔想同佢父母住開第二處，一定要住埋一齊，咁佢見風駛一定應承唔買樓嘅啦。

　　張：（大喜）呢個辦法幾好。

　　清：咁我而家即刻去。

　　（清匆匆出。）

　　C.O.

　　第四十六場

　　景：酒家連街道

　　時：日

　　人：清、吳、張、路人

　　C.I.

　　（清匆匆出南興，遠去。（片刻——（南興門內忽然跑出小吳來，落荒而走，領班帽子落地也不及拾。（張由南興追出，見吳已遠去，回身入南興。）

　　D.O.

學達書庫(xuoda.com)