六月新娘(100)_張愛玲

一〇〇

　　第二十七場

　　景：張家

　　時：夜

　　人：張、張太、佩、煥、女傭

　　D.I.

　　（張吃蘿蔔糕，張太太旁坐做針線。

　　（門鈴響，女傭開門。佩入，迷迷糊糊地走向自己臥室——可儘量誇張。

　　（佩經過張及張太太身邊竟如同未發覺身旁有人。

　　（張及張太太奇怪。）

　　張：阿佩，你做乜呀？

　　（佩繼續前行。張來至佩身邊叫。）

　　張：阿佩！

　　佩：（這才回身望父）唔！

　　張：你做乜咁樣，唔系有乜嘢唔妥喇嗎？

　　佩：唔系呀！

　　張：我叫你代表我去傾嗰啲嘢而家傾成點呀？

　　佩：傾妥曬咯！

　　張：我知道叫你啲刁蠻女仔出馬梗傾唔掂嘅，佢地應承曬我地啲條件喇嗎？

　　佩：應承！大家讓步多少啦，寫曬落嚟咯，我俾你睇嚇。（開手袋取紙）

　　張：（一望鐘）咦，夠鐘喇。（走向無線電）

　　佩：（取紙交張）爸爸你睇嚇。

　　張：唔好嘈。（開收音機）

　　（佩無奈將紙放回手袋，至另一邊沙發坐下。

　　（張邊吃蘿蔔糕，邊聽曼的節目。）

　　O.S.曼：而家答覆劉國慶君嘅問題。劉君，我好同情你，響而家呢個二十世紀嘅原子時代，竟然仲有咁頑固嘅父親干涉仔女嘅婚姻，甚至於唔准你同女朋友通電話。我認為你父親嘅呢種行為，不但野蠻，而且系十分愚蠢嘅……

　　張：咦！唔准同女朋友通電話？好似響處話我噃！

　　佩：邊處系講你呀，你自己多心啫。

　　O.S.曼：……至於你父親，因為女家冇辦法攞出一份豐厚嘅嫁妝，就反對你嘅婚事，更加系荒唐到極點。呢種咁欺貧重富嘅行為，邊處似同仔娶新抱，直情當個仔系條件、貨物一樣，等人地出高價嚟買佢個仔……

　　（張怒關收音機憤憤地猛吃蘿蔔糕。）

　　佩：爸爸，我諗起啦，呢個女人聲好似……（突然心虛止住）

　　張：（劈掌）系佢啦！唔怪得越聽越似響處鬧我，一定系佢！

　　張太：邊個呀？

　　張：就系嗰個外江女李曼玲呀，咁你都聽唔出佢把聲？

　　張太：系噃，阿清話佢系響電臺度播音嘅。

　　張：唔怪得知我一見佢面就話點解咁面熟呢，原來系佢把聲好熟……（對張太太）你睇嚇你中意嘅嗰個寶貝新抱呀，居然公開響電臺度鬧我，仲成世界嘅，等阿清番嚟，我要問嚇佢至得……（突然）噯喲，噯喲！（置箸捧心叫痛）

　　張太：做乜嘢？又是胃痛呀？

　　張：胃乜嘢痛呀，俾個衰女激到我心痛就真！

　　（張太太忙扶張躺下。）

　　佩：使唔使叫醫生嚟同爸爸睇嚇？

　　張太：咁夜去邊度揾醫生出診呀？

　　佩：我介紹個醫生俾爸爸喇，佢一定肯嚟嘅。

　　張太：咁快啲去喇。

　　（佩打電話。）

　　Diss.

　　（半小時後，張蓋氈臥沙發，張太太旁坐。佩導煥入。）

　　佩：爸爸，呢位系李醫生。

　　張：（坐起）乜又系呢個黃綠醫生呀，唔使佢睇咯，快啲叫佢扯。

　　佩：爸爸，李醫生特登趕嚟同你睇病，做乜你咁冇禮貌啫！

　　張：你明知我唔中意啲外江佬醫生，仲叫佢嚟做乜？

　　張太：咁夜揾唔到廣東醫生啦嘛！

　　張：佢話叫我唔好食蘿蔔糕，食多咗會中風，我食咗咁多年傷風都未試過，你話呢啲醫生信唔信得過呀？（向煥）扯！

　　（煥笑笑提皮包向外走。）

　　張太：（向煥抱歉地）真系對唔住，上一次啲出診費同呢次計埋一齊啦！

　　喚：不不，不用了。

　　張：你叫我唔好食蘿蔔糕，我偏偏食多啲俾你睇。（吃糕）

　　佩：（用國語）今天真是對不起，爸爸就是這樣，對外省人有偏見。

　　煥：我知道，我知道。（出）

　　（佩送出。）

　　F.O.

　　第二十八場

　　景：張家

　　時：日

　　人：清、佩

　　F.I.

　　（清來至門口，見佩穿著整齊由臥室出。）

　　清：出街呀？

　　佩：唔！去睇醫生。

　　清：呢兩日辛苦你啦，累你要去睇醫生。

　　佩：你知道就好啦！

　　清：第日我請你飲茶。

　　佩：（點頭）唔好唔記得。

　　（二人出門。）

　　D.O.

學達書庫(xuoda.com)