六月新娘(91)_張愛玲

九一

　　（飯後，女傭收拾好餐台，二老在休息，佩在打字。

　　（門鈴響，佩近門，往開，張太太止之，搶往開門。

　　（門間，清偕曼入。）

　　清：媽媽，（指曼）呢位系李小姐。（指張太太）我媽媽。

　　曼：（很有禮的）伯母！

　　清：（介紹）我爸爸、妹妹！

　　曼：老伯，張小姐！

　　張太：請坐，請坐！

　　曼：聽阿清話，老伯最中意食蘿蔔糕，所以今日特登做咗啲蘿蔔糕拎來孝敬老伯、伯母。（交紙包給張太太）

　　張太：乜李小姐蘿蔔糕都識整呀？真系叻啦！

　　曼：整得唔好！

　　張：唔使客氣咯，而家啲女仔剩系肯自己落廚房做點心已經萬二分難得咯！（望望佩）

　　（佩不悅。

　　（張拆開紙包取食。）

　　張太：！乜你咁，你想食，等我煎咗先至食呀！

　　（張很緊張地止住各人聲張——全體靜寂。）

　　張：（搖頭閉目，作專家品題狀）嚇！好嘢！整得好味道，簡直同我鋪頭做嘅一式一樣！

　　佩：爸爸都唔知醜嘅，自己話自己鋪頭啲嘢好食！

　　張：使乜講，我南興酒家啲蘿蔔糕系出名嘅啦。李小姐居然能夠整得一樣咁好味道，真系架勢！阿佩，你要同李小姐學嚇至得，人地李小姐幾能幹！

　　（佩有慍色。）

　　張太：李小姐，唔啱你嚟教我地做蘿蔔糕，好唔好呀？

　　曼：（吃驚）唔得！我亂咁嚟嘅啫。

　　張太：做得咁好，仲使乜客氣呀！

　　張：（突然地）嚇！李小姐好面熟，好似響邊處見過嘅？

　　曼：系咩？忽然間想唔起啦。

　　張：（繼續吃糕，向妻）認真好味，你一定要叫李小姐教你點做至得，阿佩都可以學嚇！

　　張太：李小姐，來來！（引路入廚）

　　（曼驚。清欲阻止。）

　　清：媽，李小姐第一次嚟就叫人落廚房，咁點得？

　　張太：怕乜嘢？一次生，兩次熟啦嘛！（細聲）就嚟做自己人咯！（徑入廚）

　　佩：（低聲）做乜咁快趣就心痛啦，又想認叻，又想擺小姐架子點得！

　　（O.S.張太太叫佩入，佩入廚。

　　（清與曼交換一瞥，無奈，跟入廚。曼走不數步，回身取手提包在手，然後入廚去。

　　（廚內——女傭在洗碗，張太太領佩、清、曼入。）

　　傭：太太，做乜嘢呀？

　　張太：我地請李小姐做蘿蔔糕！

　　傭：做蘿蔔糕？（愕然）

　　張太：得啦。（取出一大籃蘿蔔，向曼）先將啲蘿蔔點呀？

　　曼：（無奈，硬著頭皮）洗乾淨先！

　　張太：（立即動手）阿四、阿佩，幫手洗蘿蔔！

　　（曼也只好加入。四女同洗蘿蔔，笑料百出，女傭啼笑皆非。）

　　清：（慌亂地）使唔使我幫手呀？

　　曼：你幫手批蘿蔔啦！（一面說，一面以眼色詢清如何辦）

　　清：（一面削，一面提醒曼）使唔使米粉？

　　曼：呀！……（望清，清猛向她打眼色）……當然要啦！

　　清：屋企好似冇米粉噃！

　　張太：有，響架處嚟，等我攞。（拭手）

　　（清一望身旁架上，真有一小袋米粉，忙取之藏懷內。）

　　張太：（在架上找）咦！啲米粉呢？點解唔見咗？

　　清：既然冇米粉，唔啱第日再做啦！

　　張太：做乜冇呀？阿四，今朝早我攞番嚟嗰啲米粉呢？

　　傭：我同你擠咗落罐度。

　　（清呆然。

　　（張太太由鐵罐內取出米粉。

　　（清即藉故解開張太太取出之布袋細視。）

　　清：哎吔，呢啲米粉有蟲嘅！

　　張太：亂講，今早至攞番嚟，點會有蟲？

　　清：系唎，呢呢，啱啱見到一隻蟲。

　　佩：喂！我地呢處唔使你呢個衛生局幫辦嚟檢查衛生呀！

　　張太：如果嫌我地唔衛生，唔啱你一陣間咪食呀！

學達書庫(xuoda.com)