吊秋喜_歌謠_學達書庫

吊秋喜

　　聽見你話死，實在見思疑。何苦輕生得咁癡？你系為人客死，心唔怪得你。死因錢債，叫我怎不傷悲！你平日，當我系知心，亦該同我講句；做乜交情三兩個月都有句言詞！往日個種恩情丟了落水：縱有金銀燒盡不到陰司，可惜飄泊在青樓，孤負你一世；煙花場上有日開眉。你名叫做秋喜，只望等到秋來還有喜意；做乜才過冬至後就被雪霜欺？今日無力春風唔共你爭得啖氣，落花無主敢就葬在春泥。此後情思有夢你便頻須寄，或者盡我呢點窮心慰嚇故知……泉路茫茫你雙腳又咁細，黃泉無客店問你向乜誰棲？青山白骨晤知憑誰祭？衰楊殘月空聽個只杜鵑啼！未必有個知心來共你擲紙，清明空恨個負紙錢飛！罷咯，不若當作你義妻，來送你入寺。等你孤魂無主，仗嚇佛力扶持！你便哀懇個位慈雲施嚇佛偈，等你轉過來生誓不做客妻！若系冤債未償，再罰你落粉地，你便揀過一個多情早早見機。我若共你未斷情緣，重有相會日子。須緊記！念嚇前恩義！講到銷魂兩字，共你死過都唔遲！

　　（《粵謳》）

學達書庫(xuoda.com)