瞿秋白上海打仗景致

上海打仗景致

　　諸位靜心聽呀，唱點啥事情？要唱一隻上海打仗景呀，讓我末細細說分明呀，從頭那個到底末唱與大眾聽。
　　有錢東洋人呀，本來嘸理性，要求條件市長在答應呀，百姓末死也勿甘心呀！日本那個軍閥末馬上就派兵。
　　大炮搿輪騰呀，洋槍匹拍聲，打仔一夜死脫嘸淘成呀！東洋末發急討救兵呀，再來那個幾千末衝鋒死乾淨。
　　打仔十幾仗呀，仗仗吃敗仗。東洋小兵勿肯開洋槍呀，軍官末眼睛白洋洋呀，活人那個裝來末死屍回東洋。
　　小兵十九路呀，本領實在大。東洋軍隊一點無生路呀，日夜末裝來三萬多呀，衝突那個幾天末仍舊打勿過。
　　勝仗打勿成呀，軍官太可恨，公共租界一步勿准進呀，日本末勿用怕追兵呀，中國那個小兵末永久打勿勝。
　　永久打勿勝呀，失敗早存心，党國大人害怕小百姓呀，打仗末只要騙騙人呀，放仔那個租界末安頓日本兵。
　　日本真野蠻呀，飛艇擲炸彈，閘北地方房子在炸坍呀，人家末燒脫交交關呀，害得那個百姓末一齊要遭難。
　　說起逃難人呀，苦處說不盡，單身出來腰無半分文呀，大哭末小喊頂傷心呀，只有那個富人末老早搬端正。
　　東洋便衣隊呀，要拿百姓害，男女捉去一淘關起來呀，婦女末衣裳要解開呀，調戲那個以後末拖來就強姦。
　　虹口老百姓呀，捉去最傷心，麻繩捆綁再要挖眼睛呀，弄得末性命活勿成呀，毒害那個大眾末將來有報應。
　　啥人來報應呀，全靠小百姓。東洋中國一致來革命呀，反對末東西洋大人呀，窮人那個出路末只有義勇軍。
　　國賊大商人呀，老早要調停，答應條件命令叫退兵呀，端正末拍賣上海城呀，請求那個英美末大家來瓜分。
　　窮人頂要緊呀，萬眾一條心，對內對外革命才贊成呀，有志末加入義勇軍呀，驅逐那個國賊末幸福過光陰。

學達書庫(xuoda.com)