劉半農·山歌_學達書庫

山歌

　　（用江陰方言）

　　郎想姐來姐想郎，
　　同勒浪一片場浪乘風涼。
　　姐肚裡勿曉的郎來郎肚裡也勿曉的姐，
　　同看仔一個油火蟲蟲飄飄漾漾過池塘。

　　＊

　　姐園裡一朵薔薇開出牆，
　　我看見仔薔薇也和看見姐一樣。
　　我說姐兒你勿送我薔薇也送個刺把我，
　　戮破仔我手末你十指尖尖替我綁一綁。

　　＊

　　劈風劈雨打熄仔我格燈籠火，
　　我走過你門頭躲一躲。
　　我也勿想你放脫仔棉條來開我，
　　只要看看你門縫裡格燈光聽你唱唱歌。

　　＊

　　你叫王三妹來我叫張二郎，
　　你住勒村底裡來我住勒村頭浪。
　　你家裡滿樹格桃花我抬頭就看得見，
　　我還看見你洗乾淨格衣裳晾勒竹竿浪。

　　＊

　　你聯竿窱窱乙是窱格我？
　　我看你殺毒毒格太陽裡打麥打的好罪過。
　　到仔幾時一日我能夠來代替你打，
　　你就坐勒樹陰底下紮紮鞋底唱唱歌。

　　＊

　　五六月裡天氣熱旺旺，
　　忙完仔勺麥又是蒔秧忙，
　　我蒔秧勺麥嘸不你送飯送湯苦，
　　你田岸浪一代一代跑跑跑得腳底乙燙？

學達書庫(xuoda.com)