救國方針|孫中山

救國方針

　　（1924年5月30日，孫中山在上海《中國晚報》演講。粵語。）

　　諸君，我哋大家系中國人。我哋知道中國幾千年來系世界上頂富頂強之國家，知道唔知道呢？但系現在中國系乜嘢嘅情形呢？中國現在就變成系世界上頂貧頂弱嘅國。中國嘅人民出海外嘅，就俾外國人欺負淩辱，看不上一個人樣；喺中國內地呢，外國對於我哋嘅政府呢，對於我哋嘅國家呢亦系睇唔起。所以，外國就有意對中國來瓜分呢一說。後來呢，覺得呢個瓜分呢，系好難實行，恐怕因為瓜分中國呢，惹出就各國自己打自己。所以呢，現在各國就協同來商量，要把中國嘅國事嚟共管，大家嚟共管中國，就系呢睇中國唔起，以為中國系不能自己管治中國。

　　諸君，試想想：我哋中國幾千年來系世界一個文明嘅國家。幾千年前中國最強盛嘅時代，就所謂千邦進貢萬國來朝，各國都要拜中國嘅上風。到到今日呢，中國反為系退化，呢個系為乜緣故呢？就系中國從舊滿州征服以後，中國人就失了個國家精神。中國亡國于滿州二百六十幾年呢，中國嘅人民就喺呢二百六十幾年之內呢就瞓著覺。所以，中國就政治退化、就文明退化、中國工商業退化，中國總所以到到今日就成為民窮財盡，就變成各國睇唔起。

　　中國墮落到今日呢個地位，我哋做國民嘅要有一種乜嘢嘅感覺呢？我哋對於國家，第一事我哋知道我哋今日之危險，先知道危險呢，我哋要設法子嚟避呢個危險，咁用乜嘢法子嚟避得呢個危險呢？就要大家同心協力嚟贊成革命，用革命嘅方法、用革命嘅主義嚟救中國。革命嘅主義系乜嘢呢？就系我哋嘅三民主義。第一，就系民族主義；第二，民權主義；第三，民生主義，用呢三種嘅主義呢，嚟救中國。呢三種嘅主義呢，我哋嘅大家要留心、要嚟考究。

　　啖從邊處能考究得呢個三民主義呢？對於呢個三民主義，我近日在呢個廣東高師，每禮拜演說一次㗎。頭一個民族主義呢，就演說了六個禮拜就講完喇；第二個民權主義呢，又演說了六個禮拜講完喇；第三個民生主義呢，不日再嚟演講。現在呢個民權主義、民族主義兩種呢已經系刻書出嚟。咁所以諸君呢，留心呢個三民主義呢要將我呢個三民主義、呢啲演說，要嚟留心詳細嚟讀過。

　　呢個三民主義呢系講得好透澈嘅，系發揮得好精密嘅，裡頭呢有好多新思想、好多新發明。諸君能讀呢個三民主義呢，就曉得用乜嘢方法嚟救國啦。我哋能照住三民主義呢種嘅方法、呢種嘅精神，大家同心協力嚟救國呢，咁就中國就可以反弱為強喇、轉貧為富喇，就可以同今日之列強嚟並駕齊驅喇！

學達書庫(xuoda.com)