山歌·魚船婦打生人相罵

魚船婦打生人相罵

　　網船上婆娘童子打生個人，
　　一場相罵鬧淫淫。
　　你一聲來我一白，
　　也弗輸來也弗贏。

　　（白）

　　也弗贏，忒好聽，只見個個婆娘參起來叫四鄰，便罵道你個丟丟響個烏蠅弗要走子去，也搭你摟一個六江水也渾，論起行戶中間來我搭你蘆上蘆下，稱起骨頭來稱八兩我半斤，看得別人便是蝦頭娘娘能介一點，自家便癩虼巴並進子天平，別人道是善善善，倒是鰍籃裡揀出來個一張嘴，呵呵呵再是個旱渴精，突出子個雙田螺頭個眼睛，久慣要是介了甲戟詐，開子張鯰魚剌達嘴，只要吃別人星，沒得又弗吃你一網兜子，終弗然撐開子船頭弗成，得知老娘是個突鯽個相罵嘴，阿呀呀，氣得我個肚皮再像子清明前個河豚，我弗像你搭吊鰟皮個妹子能介弗收管個兩腳蚌，也弗像你當黃嘗嘴家婆能介齆臭鱔能，當面前吃別人罵絕子個團魚鱉背，背後吃別人挖盡子螺螄窟臀，你個樣正叫子田雞乾，骨裡臭，也要伸出子烏龜頭做耍人，打生個氣得肚膨氣脹，便罵道你個個鵒鶨鴟個討人，一張嘴嘗是鴉飛鵲亂，久慣是牛皮烏斤，面皮便野雞斑起，白螵手個雙眼睛，連番要做個火老鴉，人人叫你是個白鷂鷹屎你也弗曾經我介一彈，弗怕你飛上了青雲，等我送得你鵲庭直出，眼見得你搭家公寒章雞能，我弗怕你搭一窠羅個十姊妹，也弗怕你搭鷂鷹頭鶻子眼個星小賊精，你再怪鳥能介捉人衝撞，笑你斑鳩教鵓鴣弗看自個絨形，憑你連夜磨尖子鴨嘴，□裡思量天鵝肉來吃星，別人家個婆娘窮做窮乾啾啾縮在窠裡，並弗會餂臀鳥能介著處奔奔，又弗是你撒食養來搭個，冉阝了要你鳥說胚介撒村，等我夾子個張毛鵓鴣看介，你個檔雌雞啼只做個人家弗成，兩個相罵子介一畫，聚集子兩邊兩岸無數個閒人，指頭大個碎囝兒盡夾箝蟹夾，好像野鴨陣飛子介一村，有介一個白頭老者喝住子兩人，說道□弗跳水弗動，見子冤便放個鷹，李家個阿姊你個樣參魚頭性格裡去使，張家第三個你個個癡鵝頭式煞認真，各有道路，各有做人，盡弗消得老鶴跌倒，只捉嘴來撐，冉阝了是介水面上使鐵搭攤浪得介盡情，四邊田裡野鴨落，你也弗去支網，東邊港裡魚扶頭，你也弗去趕青，又弗是爭田奪地，天呀，只問你相罵有耍好聽，依我勸開子罷，能我老人家是一派正經，

　　（歌）

　　並弗是羹碗裡魚頭撥撥轉，
　　支花野味趙談春。

　　昔年有趙談春者，善詼諧，吳語謂沒正經日趙，因日趙談春雲。

學達書庫(xuoda.com)