山歌·破帽歌_學達書庫

破帽歌

　　有介一隻山歌唱你儂聽，
　　新翻騰打扮弄聰明。

　　（白）

　　也弗唱蒲鞋氈襪，
　　也弗唱直掇海青。
　　也弗唱絹裙綾褲，
　　也弗唱香袋汗巾。
　　單題唱個頭上帽子，
　　歷代幾樣翻新。

　　舊時作尖頂長號，
　　後來改子平頂鼓墩，
　　咦有纓子朗鎖密結瓦棱。
　　惟有小張官人頭上帽子戴又戴得個停當，
　　盔又盔得介娉婷。

　　光油油露出子杭州丫髻，
　　亮晃晃插起重慶金簪，
　　後頭掂出子雙螭虎圈子，
　　前頭推起子九針子網巾。

　　帽子帶得介長遠，
　　年深月久成精。
　　忽朝一日頭上說話：
　　叫聲小張官人，
　　我一跟跟你兩三巡黃冊，
　　你一戴戴我二三十個清明。
　　春秋四季並弗曾盔頂絲羅帽，
　　寒臘月並弗曾盔頂帽氈巾。

　　總成你相交子多少姹童窠子，
　　陪伴子若干監生舉人，
　　看子多少提偶扮戲遊湖踏青。
　　唱船裡人中顯貴，
　　酒樓上鬧裡奪尊。

　　捉個豬膽去油，
　　教我受子多少醃苦惱，
　　捉個百藥箭上色，
　　教我吃子多少鳥皂泥筋。

　　板刷常常相會，
　　引線弗曾離身，
　　一日子修理得介停當，
　　戴出子閶門。

　　月城裡遇著子朋友說話，
　　聚集子東西來往無數個閒人。
　　看呆子山東販誇子，
　　立癡子江西販帽子個客人。

　　江西老鄉談弗絕，
　　蘇州歇後語連聲，
　　十字街蟒龍玉烏紗冠石皮得介測癩，
　　老弗識波羅生荔枝圓重夕得介忒村。

　　日頭照子好像走差次身頭上草帽，
　　雨落濕子好像壓匾介一個老人頭巾。
　　撚來手裡好像緊介一支偷瓜蠍，
　　落來地上好像矗起來介一支刺毛鶯。

　　修帽見子一嚇，
　　洗網巾吃子一驚。
　　破靴羊毛換銅錢緝三問四，
　　賣花換眢豆弗曾離門。

　　小張聽得幾句言語，
　　嚇得冷汗直淋。
　　立來無人煙所在，
　　探下來看介一看，
　　真當弗像，
　　只得去貼舊換新。

　　欲要黃帽鋪裡去講講，
　　咦弗好戴子進渠大門。
　　思量無些擺佈，
　　只得借子一頂麻布頭巾。

　　皺漫漫好像看墳個董永，
　　軟搭搭好像丁憂個洞賓。
　　遇著子承天寺裡個和尚，
　　定道請渠領喪，
　　入木，
　　撞見了玄妙觀裡道士，
　　定道請渠退煞，
　　念經。

　　鄉鄰趕趁子分子，
　　朋友怕闕子人情。
　　小張道個是我裡宗兄便服，
　　弗消得列位介費心。

　　無些意思介一日，
　　只得走轉家門，
　　家婆道你出去子介一日，
　　阿會幹子帽子個正經。

　　咳，
　　家婆，
　　弗要話起，
　　走腫子個腳底，
　　擢痛子個背心。

　　餓過子個肚裡，看花子個眼睛。
　　帽鋪家家走到，
　　價錢個個弗等，
　　只得反渠轉來假充一個朗鎖戴戴，
　　到下橋行市再尋。

　　彈忒子齷齪，
　　吹忒子個灰塵上子盔頭盔介一盔，
　　屈剛盔子三五六星。
　　小張捶胸跌腳，
　　說道弗匡你介一個收成，
　　家婆道你也弗要大驚小怪，
　　還幹若干正經。

　　大塊頭兒改雙涼鞋，
　　斜塊頭兒，改子外公頭上束髮包巾。
　　帽沿拿來做個紮額，
　　我裡夏天恍恍，
　　碎塊頭兒做子一頂細密網巾。

　　頭腦做個刷牙來刷刷，
　　零零碎碎做個香袋熏熏。
　　帽子道我前世作盡子奢孽，
　　你公婆兩個擺佈得我介盡情。

　　小張道，
　　宗兄大哥，
　　帽子大人，
　　你儂弗要出言吐氣，
　　我儂唱介一支曲子你聽聽：

　　（駐雲飛）

　　帽樣新鮮不復完，
　　今剩缺連，
　　一向承裝觀，
　　今日堪埋怨，
　　喳，
　　戴你不多年，
　　帽子道盡勾你哉，
　　如何稀爛，
　　想是當初，
　　修舊將咱騙，
　　為你冤家費我錢。

　　（白）

　　帽子道鼓弗打弗響，
　　鐘弗撞弗鳴，
　　別人戴子風裡坐，
　　你戴子我雪裡奔，
　　憑你改長改短，
　　我也無怒無嗔。

　　捉我改子外公頭上束髮包巾，
　　我也感承你頂戴，
　　捉我改子你家婆頭上紮額，
　　我也當得奉承。

　　（歌）

　　捉我改子刷牙正要擢你臭賊個張嘴，
　　捉我改子涼鞋正要打碎你個老腳跟。

　　遊翰瑣言尚有破氈襪歌，無味，故不錄。

學達書庫(xuoda.com)